ألهاكم التكاثر

أكيد اللي هيقرا البوست ده هيستغرب جدا لإني عمري ما كتبت بالعربي.. هو أنا حسيت ان انا مينفعش اكتب عن الموضوع ده غير بالعربي
المهم.. أنا بعد ما قريت اللي أسماء كتباه افتكرت موضوع انا طول عمري نفسي اتكلم عليه.. و هو تفسير الأية ::

{قال تعالى: { ألهاكم التكاثر حتّى زرتم المقابر

انا من الناس اللي لما كنت بقرا الأية ديه, اللي بييجي في ذهني علطول كمعنى للأية هو أن الناس بتتشغل بإنها يبقي عندهم أولاد كتير و بعدين يبقى عندهم أحفاد و هكذا.. لحد ما مرة سمعت تفسير الأية من حد (لا أتذكره الأن) بيقول تفسير تاني مقنع اكتر من نفسيري العظيم

التكاثر :: كلمة واحدة صحيح بس لو فكرت فيها هتلاقى كذا معنى
التكاثر في الأموال , التكاثر في العلم, التكاثر في الذرية, التكاثر في الشهادات... التكاثر ..التكاثر في حاجات كتير
و ده فعلا صحيح جدا.. اى واحد فينا هيلاقي نفسه مقضي حياته كلها في الدراسة و البيت و الشغل و .. و حاجات كتير كلها لغرض واحد هو انه يبقى أحسن, أو يكسب فلوس أكتر, أو يعرف أكتر.. و كلها حاجات تقع تحت كلمة التكاثر

اد ايه انا بقيت احس بالأية ديه كل لما أقرأها دلوقتي.. و اد ايه بقيت انتبه ان الحاجات ديه متشغلنيش علشان الجزء التاني من الآية حتّى زرتم المقابر

يا رب الكلام ده يبقى مفيد لأى حد.. و يا رب مفيش حاجة تشغلنا ابدا عن ذكر الله.. و عذرا على لغتي العربية الفصيحة