الواحد طول عمره بيقول إنه عايز يحسن من أحوال البلد.. أنا من الناس اللي طول عمري بأقول كده.. بس لو بصينا بصة واقعية هنلاقي إن ماحدش فعلا بيعمل حاجة !!
أنا لما سافرت بره فهمت اد إيه الواحد فعلا عمره ماعمل حاجة تحسين بلده .. يعني أنا هادي مثال على المرور.. أنا من الناس اللي كنت معتبرة نفسي منظبطة في السواقة .. يعني عمري مامشيت في شارع بالشقلوب ولا كده .. ومع ذلك.. أنا أول ماجيت هنا اكتشفت إني مش بعرف اسوق أصلا !! .. بجد واللهِ .. عرفت إن السواقة مش مجرد إن الواحد يركب عربية وبس .. أنا فعلا اتعقدت من الناس هنا.. عايز تدخل يمين.. العربية اللي وراك توسعلك .. في حد بيفكر يعدي الشارع.. الشارع كله يقف !!! .. لو الساعة 10 بالليل ومفيش حد, الناس برده بتقف في الإشارة !!
مثال آخر .. الاهتمام بالصحة.. الساعة 7 الصبح تلاقي الناس كلها بتجري وتلعب رياضة.. وبعدين يروحوا الشغل.. أنا مش هأتكلم على الناس في مصر (علشان دول يا عيني مطحونين) بس هادي مثال بالمصريين اللي هنا .. ماشاء الله الكل نايم يوم الأجازة لحد 10 و 11 .. طيب العيب في إيه !! .. بالضبط , العيب فينا !!
مثال آخر.. خد بعضك هنا وروح أي سوبرماركت .. وإنت بتشتري هتقابل ناس في وشك لا تعرفهم ولا يعرفوك.. ومع ذلك فـهيبتسموا في . وشك !! .. وكانهم سمعوا حديث الرسول "تبسمك في وجه اخيك صادقة
حسيت بحسرة وانا هنا على بلدي.. إن احنا قدامنا كتير قوي لما نوصل زي الناس ديه .. والمشكلة الكبيرة إن معظم الحاجات تحت عنوان .. "ابدا بنفسك" بس احنا مش واخدين بالنا.. وفي ال آخر معتقدين إننا بنعمل حاجات تخلي بلدنا أحسن !!
